Veitur og DataLab hefja samstarf um hagnýtingu snjallmælagagna

Veitur vilja hjálpa viðskiptavinum að skilja eigin notkun á rafmagni og heitu vatni og veita þeim innblástur til góðra ákvarðana sem draga úr notkun, spara þeim kostnað og stuðla að ábyrgri nýtingu takmarkaðra auðlinda. 

Snjöll mælaborð sem byggja á gögnum frá snjallmælum  

Veitur hafa falið DataLab að framleiða gagnadrifna hugbúnaðarlausn sem byggir á gögnum úr snjallmælum sem Veitur hafa innleitt hjá viðskiptavinum á undanförnum árum. Gögnin lýsa notkun á heitu vatni og rafmagni af mun meiri nákvæmni en áður.  

Á meðfylgjandi mynd eru þau Sigríður Sigurðardóttir, forstöðumaður stafrænnar umbreytingar hjá Veitum, og Brynjólfur Borgar, framkvæmdastjóri DataLab, að handsala samninginn.

Aðferðir gagnavísinda og gervigreind verða nýtt til að smíða snjalla og sérsniðna mælikvarða sem veita innsýn í notkun, setja hana í samhengi og veita sérsniðnar leiðbeiningar fyrir hvern og einn. 

Aðallega verður lögð áhersla á að 

• varpa ljósi á stöðu, þróun og líklega þróun notkunar.

• setja notkun í samhengi og veita samanburð. 

• benda á óvenjulega notkun og veita hollráð eða hvetja til aðgerða. 

Myndræn framsetning  verður einföld, gagnvirk og notendamiðuð svo hún veiti innblástur til ákvarðana sem stuðla að skynsamlegri notkun á rafmagni og heitu vatni. 

Verkefnið er þegar hafið og er gert ráð fyrir að snjöll mælaborð birtist viðskiptavinum á mínum síðum á vef Veitna á næsta ári. 

„Við viljum gera viðskiptavinum okkar kleift að sjá og skilja eigin orkunotkun – og taka betri ákvarðanir sem gagnast bæði veskinu og umhverfinu. Með DataLab fáum við öflugan samstarfsaðila sem hjálpar okkur að umbreyta snjallmælagögnum í gagnlegar og notendavænar lausnir.“ 

Sigríður Sigurðardóttir, forstöðumaður stafrænnar umbreytingar hjá Veitum 

“Við hlökkum mikið til samstarfsins við Veitur enda erfitt að ímynda sér áhugaverðari gögn til að vinna úr og matreiða  fyrir stóran hluta þjóðarinnar.” 

Brynjólfur Borgar Jónsson, stofnandi og framkvæmdastjóri DataLab