Árið sem Ari fullorðnaðist

DataLab byrjaði að vinna með spunagreind (e. generative AI) og gera markvissar tilraunir með tæknina snemma árs 2023, í kjölfar ChatGPT-4. Fljótlega áttuðum við okkur á því að þessi tækni muni spila gríðarlega stórt hlutverk í tækniþróun í náinni framtíð. Það væri því nauðsynlegt fyrir okkur að taka hana föstum tökum.

Leiðandi aðilar í tæknibransanum spá því að bylting verði í þróun hugbúnaðarlausna sem hugsa með mállíkönum árið 2025.  

Við höfum því búið til kerfið Ara sem er í raun leið fyrir okkur til að þróa hratt og örugglega hugbúnað sem notar mállíkön til að vinna úr gögnum og gefa skrifleg svör á þeim grunni. Við höfum lagt mikla áherslu á það undanfarin misseri að það sem er þróað með Ara sé skalanlegt og auðvelt sé að viðhalda því. Með Ara getum við nú þróað og sett upp á nokkrum vikum sérsmíðaðar en skalanlegar spunagreindarlausnir sem svara upp úr fjölbreyttum gögnum viðskiptavina og leysa ýmis verkefni. 

Þörfin fyrir skalanleika 

Íslensk fyrirtæki og stofnanir hafa sýnt Ara mikinn áhuga en í flestum tilfellum hefur þurft að sérsníða lausnina að þörfum hvers og eins. Stundum er áherslan á almenna svörun byggða á gögnum viðkomandi fyrirtækis en í öðrum tilfellum þarf að sjálfvirknivæða flókin innanhússferli. Að auki eru gagna- og tækniumhverfi þessara aðila eins fjölbreytt og þau eru mörg.  

Þessi fjölbreytni hefur sett pressu á okkur að tryggja að hver lausn sé ekki aðeins sérsniðin heldur einnig skalanleg og sjálfbær til framtíðar. Á sama tíma höfum við lært að það er mjög margt sem má samnýta milli verkefna og að það myndi skapa mikið virði fyrir viðskiptavini okkar. 

Bergur, Sigurður og Kjartan ræða mikilvægi skalanleikans.

Mikilvægi endurnýtingar 

Í upphafi var viðmót, bakendi og innviðakóði þróað frá grunni fyrir hvern einasta viðskiptavin. Þetta hafði í för með sér að stórir hlutar Ara-verkefna voru sífellt endurskrifaðir, sem leiddi til þess að lítil endurnýting á lausnum átti sér stað. Afleiðingin var að þróun nýrrar vöru fyrir hvern viðskiptavin tók töluvert lengri tíma en nauðsynlegt var. Þetta er eðlilegt þegar framtíðin er óljós og verið er að prufa sig áfram með nýja tækni en þegar fjöldi Ara-verkefna jókst skapaðist aukin og óþörf vinna við að uppfæra kerfi á þessu formi. 

Á síðasta ári þróuðum við nýjan arkitektúr með áherslu á endurnýtingu lausna í öllum þáttum kerfisins – viðmóti, bakenda og innviðakóða. Nýja útfærslan gerir okkur kleift að endurnýta viðmótið, sem nú er hægt að aðlaga að þörfum viðskiptavina með einföldum hætti. Í bakendanum höfum við byrjað að smíða endurnýtanlega kóðapakka, sem eru auðveldlega uppfærðir. Að auki höfum við þróað sameiginlegan og endurnýtanlegan innviðakóða, sem hægt er að nota bæði fyrir okkar eigin innviði og innviði viðskiptavina okkar. 

Jónas hefur vit á innviðum sem styðja við kröfuharðar gervigreindarlausnir.

Einfaldara - öruggara 

Þessi nýja nálgun hefur aukið hraða við uppsetningu lausna og dregið úr þróunartíma. Uppfærslur á Ara verða einnig mun einfaldari með þessu kerfi. Þar að auki hefur nýi arkitektúrinn gert okkur kleift að sjálfvirknivæða vinnslu á gögnum sem Ari nýtir á mun skilvirkari hátt. Allt þetta leiðir til minni villuhættu og meiri gæða í þróun hugbúnaðarins. Í leiðinni höfum við jafnframt bætt öryggisstaðla okkar, þar sem við höfum innleitt „code scanner“ sem tryggir að kóðinn uppfylli helstu öryggisstaðla í nútíma hugbúnaðarþróun. 

Þessi nýja nálgun hefur ekki aðeins hraðað þróunarferlinu heldur einnig styrkt stoðir Ara varðandi þróun sveigjanlegra og skilvirkra lausna fyrir fjölbreyttan hóp viðskiptavina. Með því að leggja áherslu á endurnýtingu og sjálfbærni í þróun höfum við skapað grundvöll fyrir stöðugar uppfærslur og aukið virði Ara til framtíðar. 

Ari er nú betur í stakk búinn til að mæta þörfum nýrra viðskiptavina og  við getum betur aðlagað lausnir á hraðan og öruggan hátt. Þessi umbreyting hefur ekki aðeins einfaldað tæknilega innviði heldur einnig gert okkur kleift að tryggja betri árangur og aukinn sveigjanleika. 

Erindrekin kerfi 

Undanfarið höfum við svo verið að stíga næsta skref í endurnýtingu kóða með því að færa okkur yfir í fjölerindrekna (e. multi-agent) uppsetningu....ég endurtek

fjölerindrekna uppsetningu.

Þetta þýðir að lausnir samanstanda af erindrekum (e. agents) sem hafa afmörkuð hlutverk, t.d. lesa úr gagnagrunni eða lesa pdf skjöl. Í miðjunni stendur síðan einn erindreki sem stýrir og kallar á hina erindrekana eftir þörfum. Með þessari aðferð má betur búta kóðann niður sem hjálpar til við endurnýtingu kóða, viðhald og þróun.  

Fjölerindrekin uppsetning þeirra Helgu og Dennis hefur vakið eftirtekt.

Hugbúnaðarplatformið Ari 

Þróunin er gríðarlega hröð þessi misserin. Því er virkilega ánægjulegt að vera búin að færa okkur úr því að vera með grunnútgáfu og yfir í að vera komin með platform sem samræmist nútíma aðferðum í hugbúnaðarþróun og styður við framtíðarþróun. Með þessu erum við búin að opna dyrnar fyrir fjölbreyttari og stærri verkefnum. Áframhaldandi þróun Ara mun síðan vonandi halda áfram að vera til fyrirmyndar í greininni og veita notendum raunverulegt virði í þeirra daglega starfi. 

Hafðu samband ef þú vilt heyra meira um Ara | Þarfasta þjóninn frá DataLab.