DataLab þróar AI lausnir fyrir sveitarfélög

Sveitarfélögin á höfuðborgarsvæðinu hafa sett nýtingu gervigreindar í forgang í áhersluverkefnum sóknaráætlunar 2026, með áherslu á að bæta þjónustu, auka skilvirkni og hagræða rekstri.

Samið hefur verið við DataLab um að stýra verkefninu og þróa AI lausnir í samstarfi við sveitarfélögin, með það að markmiði að fyrstu lausnirnar nýtist strax á þessu ári.

Samhliða er starfandi sérstakur samráðsvettvangur sveitarfélaganna sem mótar stefnu og forgangsröðun verkefna, þannig að nýting gervigreindar verði markviss og samræmd eins og unnt er. 

Áhersla er lögð á að fram komi lausnir sem nýtist sveitarfélögum við úrlausn sameiginlegra verkefna. Þannig verða lausnir t.d. þróaðar í samstarfi við 1-2 sveitarfélög og þær síðar yfirfærðar á fleiri með tilheyrandi hagræði. Einnig er um að ræða lausnir sem eru hannaðar og þróaðar fyrir öll sveitarfélögin samtímis. 

Nánar má lesa um verkefnið í frétt sem birtist á vef SSH.

Á myndinni má sjá Brynjólf Borgar Jónsson framkvæmdastjóra DataLab og Pál Björgvin Guðmundsson framkvæmdastjóra SSH að lokinni rafrænni undirritun samningsins á skrifstofu SSH í Hamraborginni.